നിങ്ങളെ കണ്ടുമുട്ടുമ്പോൾചിരിക്കേണ്ട രീതി ഞാൻ
കണ്ണാടിക്കു മുന്നിൽ ശീലിച്ചു.
എന്റെ റെസ്യൂമെ
എങ്ങനെയൊക്കെയെന്നെ
ഉപയോഗിക്കാം എന്നതിന്റെ
രേഖപ്പെടുത്തലായിരുന്നു.
ഞാൻ ജീവിക്കുന്നതെന്ന് നിങ്ങൾ
വിശ്വസിക്കേണ്ട ജീവിതമായിരുന്നു
എന്റെ സോഷ്യൽ പ്രൊഫൈൽ.
നിങ്ങളിൽ നിന്നുമങ്ങനെയാണ്
ഈ ജോലി ഞാൻ സ്വന്തമാക്കിയത്.
ചെയ്തതിനുള്ളതല്ല കൂലി.
ചെയ്തുകൊണ്ടേയിരിക്കാനുള്ള
പ്രലോഭനമത്രേ അത്.
ഇപ്പോൾ
ഇടയ്ക്കിടെ
കണ്ണാടി നോക്കി ചിരി ഉറപ്പിക്കണം.
റെസ്യൂമെ
ടു-ഡു ലിസ്റ്റാക്കണം.
ഒഴിവുനേരങ്ങളിൽ
പ്രൊഫൈൽ
അപ്ഡേറ്റ് ചെയ്യണം.
നിങ്ങൾ ജോലിക്കെടുത്ത
മനുഷ്യനെ നിലനിർത്താൻ
അയാളായി ജീവിക്കലാണ്
ശരിക്കുമെന്റെ ജോലി.